❜❜
.
سكن جامعة الأميرة نورة
نتكلم شوي ع السكن, التحقت من قبل سنتين تقريبا . .
.
مرحلة قبل الإلتحاق بالسكن
كانت مرحلة جدا كئيبةة, للحين مصدومة من نفسي كيف قدرت أتحمل الوضع المزمن اللي كنت فيه
لكن كل شيء يهون في سبيل طلب العلم = ) !!
كان تبعد منطقتي ع الرياض أكثر من 150كلم, أحيانا مع الزحمة يآخذ المشوار من الزحمة حول 4 ساعات وأكثر والمفترض تكون بس ساعتين ونص . .
ما كان فيه وقت لنفسي ولمذاكرتي أبدًا . .
أرجع ع قرب المغرب وأحيانا بعده, أنام إلى الساعة 5:00 تقريبا وأتجهز وأطلع للجامعة
استمريت ع الوضع هذا شهرين أو 3 وقبلها كنت في جامعة سعود وبرضو نفس المشوار . .
يعني تقريبا أكثر من سنة رآحت علي وانا في وسط فان مخيس ><“
المهم اُفتتحت الجامعة الجديدة وكان الإسكان جدًا جميل والأريح انو في وسط الجامعة يعني المشوار رآح يقل أكثر . .
.
مرحلة إقناع أهلي
مسألة إني أبتعد عن أمي وأكون في مكان ثاني تسبب لها هوس, مع إن المشوار قريب, بس قليبها ما يساعد =)
أنا وأختي كنا بنفس الجامعة وبدينا نحاول نقنعها هي والوالد .
الوالد وافق من أول محاولة بعد ما وريناه الصور وفهمناه النظام ولاحظ قد إيش السكن كبير وكذا
وبالذات انو فاهم معاناتنا مع المشاوير وخطورة الطريق وقت العج والأمطار . .
بس ست الحبايب シ
كل ما خلآص قربت تقتنع تروح تكلم جدتي وتخرب علينا :( . .
. .
ولا جارتنا بنت الـ … ><“
تجلس تحكيها قصص وخرابيط وهي تصدق = )
طيب ليه ياخي = ) !!
المهم تعبنا كثثير, وقررنا نكمل أوراقنا ونخليها أمام الأمر الواقع / وهذا اللي صار ووافقت بعدين
ولاحظت قد إيش ارتحنا من المشاوير وارتفعت درجاتنا وعرفت انو هالشيء بمصلحتنا وكذا ^^”
(أتكلم عني أنا وأختي).
مرحلة الإنتقال
من أول ما قدمت أوراقي وانا وأختي نسجل أهم اللي نحتاجة بنوت, ونحاول نجيبه بأقرب فرصة . .
هالشيء سهل علينا أشياء كثير بعدين صراحة, لإن ما كنا متعودين نعتمد ع أنفسنا
وكانت أول خطوة عشآن نثق بأنفسنا أكثر . .
المهم أختي خلصت أوراقها وانتقلت قبلي بيومين تقريبا, ولما كانت بتطلع من البيت سوت مناحة وحركات أبيض وأسود = )
إلا انا ياخي عادي عندي أحس, كل ويكند بشوف نفس الخشش أصيح ليه ! > تبلد مشاعر الله وكيلك -__-
المهم انتقلت وكان عفشي كثير تقريبا بس ساعدوني الأمن النسائي ما قصروا
المبنى كان جديد وكنا أول دفعة تسكن, كان جدا هادئ الشيء اللي حسسني وقتها انو أنا فعلا طلعت من بيت أهلي !!
حسيت فجأة اني متزوجة من غير زوج =) !!
اللي ما كنت عاملة حسابة ما جبت معي أي قطعة شتوية
السكن كان بارد مرةة, طلبت من الإشراف يقفلوه بس قالوا انو من الصيانة نفسهم وما يداوموا أيام الويكند = )
اضطريت أني أطلع كل خلاقيني وأتدفا وأنام
اليوم الثاني داومت وحسيت بفرق كبببببير في المشوار لا يمكن يتقارنون ببعض . .
أول كنت أقوم الساعة 5:00 وكلاسي يبدأ 9 !!
والحين قبل الكلآس بنص ساعة بس !! أي نعيمٌ هذا يا رجل 
!!!
!!!
.
السكن مريح بنسبة 70% الحمدلله, فيه كم شغلة محتاجينها كثير لكن مع بعض طالبات وإدراة رآح نحس الوضع إن شاء الله
الشيء الوحيد اللي للحين مو لاقين له حل ! الأكل
السكن متعاقد مع شركة الخطوط السعودية, وما يحتاج أقول قد إيش أكلهم ما ينأكل, الله يديم النعمة بس
ومافي مطبخ كامل مجهز لنا, وممنوعين من الأجهزة, فكل أكلنا من برى
لكن السنة هذي بإذن الله رآح نحاول نغير أشياء كثيرة في السكن للأحسن . ..
❜❜
وبس هذي بداية مرحلتي الجديدة ^^”
السكن علمني أشياء كثيرة أبسطها أعتمد ع نفسي كثثير, قدرت أنجز الكثير في وقتي وزادت ثقتي بنفسي . .
دخلت السكن مع كم بنت كانوا معي في نفس المدرسة ماكنت أعرف عنهم أي شيء
واليوم هم خواتي, وأحس بغباء لإني ما عرفتهم من قبل واحنا يوميا بنفس المكان . .
ما أقدر أتصور أمس من غير المرحلة هذي من حياتي, ولا أتخيل بكرة من غير النآس اللي رآح تجبرنا الحياة نبتعد شوي من بعض
فالأخير لازم نطلع من كل مرحلة بخبرة ونآس تكون سند لنا, وهذا اللي أخذته الحمدلله ‘‘
‘‘
❜❜
نستنى تدوينة الالات المسموح بها في السكن
ردحذفياليت لاهنتي تعلمينا ايش الاشياء المسموح لي اخذها معي في السكن؛ مثلاً الاجهزه ؟الابتوب - الطابعه
ردحذفالمقتنيات الخاصه مثل الملابس والحوسه كلها عادي اجيب كثير يعني؟
بالنسبه للغرف بعد تكون مجهزه ولا احتاج اجيب اسفنجه وبطانيه ومخده😂💔
واخيراً كيف نظام الانتقال الى الجامعه؟ يكون من السكن الى الجامعه بسيارات او مشي او باص او كيف؟
يعطيك العافيه و اسفه اني طولت عليكك🌹